Heinrich Zwemstra is op 17 Februarie 1978 gebore. Hy is die 2de van 4 seuns. Hy het skoolgegaan in Kliprivier en Alberton en Matrikuleer in 1996 aan die Hoërskool Dinamika in Alberton. Daarna gaan studeer hy ingenieurswese aan die PU vir CHO. In daardie tyd besef hy dat die Here hom roep om vir predikant te studeer en hy begin daarmee in 1999.

Op die PUK ontmoet hy vir Jacomien Wille. Hulle trou 24 November 2001 gaan woon in Potchefstroom, waar hulle nog ’n rukkie saam studeer. In 2003 voltooi Heinrich sy meestersgraad in Etiek en Jacomien haar meestersgraad in Bybelse Grieks. Op 18 November 2003 word Jacobus Zwemstra gebore.

Hulle gaan woon vir ’n jaar in Heidelberg terwyl Heinrich jeugwerk en evangelisasie doen saam met die Gereformeerde Kerk Heidelberg. In Februarie 2005 word hy bevestig as predikant van die Gereformeerde Kerk Vereeniging ’95 en die gesinnetjie gaan vestig hulle in Vereeniging. Nelrie word op 3 Augustus 2005 daar gebore.

In 2007 voltooi Heinrich sy doktorsgraad in Etiek. En in dieselfde tyd kry hy die roeping om in Zambië by ’n kollege, wat predikante oplei, te gaan werk.

In Februarie 2008 trek hy en sy gesin na die Ooste van Zambië. Hulle gaan woon op ’n plaas waar Covenant College ook is. Daar gee Heinrich klas vir predikante uit die omgewing wat geen ander Teologiese opleiding het nie. Jacomien help ook met die alledaagse take op die sendingstasie, maar haar hooftaak is om huisvrou te wees en om die kinders tuisonderrig te gee.

Die nuutste toevoeging tot hulle gesin is Anel wat op 7 Mei 2010 gebore is. Sy is ’n gesonde baba en ’n regte sonstraaltjie in die huis.